MatteüsMarkusLucasJohannesHandelingenRomeinen1 Korintiërs2 KorintiërsGalatenEfeziërsFilippenzenKolossenzen1 Tessalonicenzen2 Tessalonicenzen1 Timoteüs2 TimoteüsTitusFilemonHebreeënJakobus1 Petrus2 Petrus1 Johannes2 Johannes3 JohannesJudasOpenbaring

Hoofdstuk 10

1 ܢܳܡܽܘܣܳܐ ܓ݁ܶܝܪ ܛܶܠܳܢܺܝܬ݂ܳܐ ܐܺܝܬ݂ ܗ݈ܘܳܐ ܒ݁ܶܗ ܕ݁ܛܳܒ݂ܳܬ݂ܳܐ ܕ݁ܰܥܬ݂ܺܝܕ݂ܳܢ ܠܳܐ ܗ݈ܘܳܐ ܩܢܽܘܡܳܐ ܕ݁ܺܝܠܗܶܝܢ ܕ݁ܨܶܒ݂ܘܳܬ݂ܳܐ ܡܶܛܽܠ ܗܳܢܳܐ ܟ݁ܰܕ݂ ܒ݁ܟ݂ܽܠ ܫܢܳܐ ܗܶܢܽܘܢ ܟ݁ܰܕ݂ ܗܶܢܽܘܢ ܕ݁ܶܒ݂ܚܶܐ ܡܶܬ݂ܩܰܪܒ݂ܺܝܢ ܗ݈ܘܰܘ ܠܳܐ ܡܶܡܬ݂ܽܘܡ ܐܶܫܟ݁ܰܚܘ ܕ݁ܢܶܓ݂ܡܪܽܘܢ ܠܰܐܝܠܶܝܢ ܕ݁ܰܡܩܰܪܒ݂ܺܝܢ ܠܗܽܘܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:1
2 ܐܶܠܽܘ ܓ݁ܶܝܪ ܓ݁ܳܡܪܺܝܢ ܗ݈ܘܰܘ ܟ݁ܒ݂ܰܪ ܕ݁ܶܝܢ ܐܶܬ݁ܬ݁ܢܺܝܚܘ ܡܶܢ ܩܽܘܪܒ݁ܳܢܰܝܗܽܘܢ ܡܶܛܽܠ ܕ݁ܠܳܐ ܡܶܟ݁ܺܝܠ ܛܳܪܝܳܐ ܗ݈ܘܳܬ݂ ܠܗܽܘܢ ܬ݁ܺܐܪܬ݁ܗܽܘܢ ܒ݁ܰܚܛܳܗܶܐ ܠܰܐܝܠܶܝܢ ܕ݁ܰܚܕ݂ܳܐ ܙܒ݂ܰܢ ܐܶܬ݁ܕ݁ܰܟ݁ܺܝܘ ܠܗܽܘܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:2
3 ܐܶܠܳܐ ܒ݁ܗܽܘܢ ܒ݁ܕ݂ܶܒ݂ܚܶܐ ܡܰܕ݂ܟ݁ܪܺܝܢ ܚܛܳܗܰܝܗܽܘܢ ܒ݁ܟ݂ܽܠ ܫܢܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:3
4 ܠܳܐ ܓ݁ܶܝܪ ܡܶܫܟ݁ܰܚ ܕ݁ܡܳܐ ܕ݁ܬ݂ܰܘܪܶܐ ܘܰܕ݂ܨܺܦ݂ܪܳܝܶܐ ܠܰܡܕ݂ܰܟ݁ܳܝܽܘ ܚܛܳܗܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:4
5 ܡܶܛܽܠ ܗܳܢܳܐ ܟ݁ܰܕ݂ ܥܳܐܶܠ ܠܥܳܠܡܳܐ ܐܶܡܰܪ ܒ݁ܕ݂ܶܒ݂ܚܶܐ ܘܩܽܘܪܒ݁ܳܢܶܐ ܠܳܐ ܨܒ݂ܰܝܬ݁ ܦ݁ܰܓ݂ܪܳܐ ܕ݁ܶܝܢ ܐܰܠܒ݁ܶܫܬ݁ܳܢܝ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:5
6 ܘܝܰܩܕ݁ܶܐ ܫܰܠܡܶܐ ܕ݁ܰܚܠܳܦ݂ ܚܛܳܗܶܐ ܠܳܐ ܫܶܐܠܬ݁ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:6
7 ܗܳܝܕ݁ܶܝܢ ܐܶܡܪܶܬ݂ ܕ݁ܗܳܐ ܐܶܢܳܐ ܐܳܬ݂ܶܐ ܐ݈ܢܳܐ ܕ݁ܰܒ݂ܪܺܝܫ ܟ݁ܬ݂ܳܒ݂ܶܐ ܟ݁ܬ݂ܺܝܒ݂ ܥܠܰܝ ܕ݁ܶܐܥܒ݁ܶܕ݂ ܨܶܒ݂ܝܳܢܳܟ݂ ܐܰܠܳܗܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:7
8 ܡܶܢ ܠܥܶܠ ܐܶܡܰܪ ܕ݁ܕ݂ܶܒ݂ܚܶܐ ܘܩܽܘܪܒ݁ܳܢܶܐ ܘܝܰܩܕ݁ܶܐ ܫܰܠܡܶܐ ܕ݁ܰܚܠܳܦ݂ ܚܛܳܗܶܐ ܠܳܐ ܨܒ݂ܰܝܬ݁ ܗܳܢܽܘܢ ܕ݁ܡܶܬ݂ܩܰܪܒ݂ܺܝܢ ܗ݈ܘܰܘ ܒ݁ܢܳܡܽܘܣܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:8
9 ܘܒ݂ܳܬ݂ܪܶܗ ܐܶܡܰܪ ܕ݁ܗܳܐ ܐܳܬ݂ܶܐ ܐ݈ܢܳܐ ܕ݁ܶܐܥܒ݁ܶܕ݂ ܨܶܒ݂ܝܳܢܳܟ݂ ܐܰܠܳܗܳܐ ܒ݁ܗܳܕ݂ܶܐ ܒ݁ܰܛܶܠ ܠܩܰܕ݂ܡܳܝܬ݁ܳܐ ܕ݁ܰܢܩܺܝܡ ܠܰܕ݁ܬ݂ܰܪܬ݁ܶܝܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:9
10 ܒ݁ܗܳܢܳܐ ܓ݁ܶܝܪ ܨܶܒ݂ܝܳܢܶܗ ܐܶܬ݂ܩܰܕ݁ܰܫܢ ܒ݁ܩܽܘܪܒ݁ܳܢܳܐ ܕ݁ܦ݂ܰܓ݂ܪܶܗ ܕ݁ܝܶܫܽܘܥ ܡܫܺܝܚܳܐ ܕ݁ܰܚܕ݂ܳܐ ܙܒ݂ܰܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:10
11 ܟ݁ܽܠ ܪܰܒ݁ ܟ݁ܽܘܡܪܶܐ ܓ݁ܶܝܪ ܕ݁ܩܳܐܶܡ ܗ݈ܘܳܐ ܘܰܡܫܰܡܶܫ ܟ݁ܽܠܝܽܘܡ ܗܶܢܽܘܢ ܒ݁ܗܶܢܽܘܢ ܕ݁ܶܒ݂ܚܶܐ ܡܩܰܪܶܒ݂ ܗ݈ܘܳܐ ܐܰܝܠܶܝܢ ܕ݁ܡܶܢ ܡܬ݂ܽܘܡ ܠܳܐ ܡܶܫܟ݁ܚܺܝܢ ܗ݈ܘܰܘ ܠܰܡܕ݂ܰܟ݁ܳܝܽܘ ܚܛܳܗܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:11
12 ܗܳܢܳܐ ܕ݁ܶܝܢ ܚܰܕ݂ ܕ݁ܶܒ݂ܚܳܐ ܩܰܪܶܒ݂ ܚܠܳܦ݂ ܚܛܳܗܶܐ ܘܺܝܬ݂ܶܒ݂ ܥܰܠ ܝܰܡܺܝܢܳܐ ܕ݁ܰܐܠܳܗܳܐ ܠܥܳܠܰܡ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:12
13 ܘܰܡܩܰܘܶܐ ܡܶܟ݁ܺܝܠ ܥܕ݂ܰܡܳܐ ܕ݁ܢܶܬ݁ܬ݁ܣܺܝܡܽܘܢ ܒ݁ܥܶܠܕ݁ܒ݂ܳܒ݂ܰܘܗ݈ܝ ܟ݁ܽܘܒ݂ܫܳܐ ܬ݁ܚܶܝܬ݂ ܪܶܓ݂ܠܰܘܗ݈ܝ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:13
14 ܒ݁ܚܰܕ݂ ܓ݁ܶܝܪ ܩܽܘܪܒ݁ܳܢܳܐ ܓ݁ܡܰܪ ܠܰܐܝܠܶܝܢ ܕ݁ܡܶܬ݂ܩܰܕ݁ܫܺܝܢ ܒ݁ܶܗ ܠܥܳܠܰܡ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:14
15 ܣܳܗܕ݁ܳܐ ܠܰܢ ܕ݁ܶܝܢ ܐܳܦ݂ ܪܽܘܚܳܐ ܕ݁ܩܽܘܕ݂ܫܳܐ ܕ݁ܶܐܡܪܰܬ݂ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:15
16 ܗܳܕ݂ܶܐ ܗ݈ܝ ܕ݁ܺܝܰܬ݂ܺܩܺܐ ܕ݁ܶܐܬ݁ܶܠ ܠܗܽܘܢ ܡܶܢ ܒ݁ܳܬ݂ܰܪ ܝܰܘܡܳܬ݂ܳܐ ܗܳܢܽܘܢ ܐܳܡܰܪ ܡܳܪܝܳܐ ܐܶܬ݁ܠܺܝܘܗ݈ܝ ܠܢܳܡܽܘܣܝ ܒ݁ܡܰܕ݁ܥܰܝܗܽܘܢ ܘܥܰܠ ܠܶܒ݁ܰܘܳܬ݂ܗܽܘܢ ܐܶܟ݂ܬ݁ܒ݂ܺܝܘܗ݈ܝ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:16
17 ܘܥܰܘܠܗܽܘܢ ܘܰܚܛܳܗܰܝܗܽܘܢ ܠܳܐ ܐܶܬ݁ܕ݁ܟ݂ܰܪ ܠܗܽܘܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:17
18 ܐܰܝܟ݁ܳܐ ܕ݁ܶܝܢ ܕ݁ܺܐܝܬ݂ ܫܽܘܒ݂ܩܳܢܳܐ ܕ݁ܰܚܛܳܗܶܐ ܠܳܐ ܡܶܬ݂ܒ݁ܥܶܐ ܩܽܘܪܒ݁ܳܢܳܐ ܕ݁ܰܚܠܳܦ݂ ܚܛܳܗܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:18
19 ܐܺܝܬ݂ ܠܰܢ ܗܳܟ݂ܺܝܠ ܐܰܚܰܝ ܓ݁ܰܠܝܽܘܬ݂ ܐܰܦ݁ܶܐ ܒ݁ܡܰܥܠܳܢܳܐ ܕ݁ܒ݂ܶܝܬ݂ ܩܽܘܕ݂ܫܳܐ ܒ݁ܰܕ݂ܡܶܗ ܕ݁ܝܶܫܽܘܥ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:19
20 ܘܽܐܘܪܚܳܐ ܕ݁ܚܰܝܶܐ ܕ݁ܚܰܕ݁ܶܬ݂ ܠܰܢ ܗܳܫܳܐ ܒ݁ܰܐܦ݁ܰܝ ܬ݁ܰܪܥܳܐ ܕ݁ܺܐܝܬ݂ܰܘܗ݈ܝ ܒ݁ܶܣܪܶܗ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:20
21 ܘܺܐܝܬ݂ ܠܰܢ ܟ݁ܽܘܡܪܳܐ ܪܰܒ݁ܳܐ ܥܰܠ ܒ݁ܰܝܬ݁ܶܗ ܕ݁ܰܐܠܳܗܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:21
22 ܢܶܩܪܽܘܒ݂ ܗܳܟ݂ܺܝܠ ܒ݁ܠܶܒ݁ܳܐ ܫܰܪܺܝܪܳܐ ܘܰܒ݂ܬ݂ܽܘܟ݂ܠܳܢܳܐ ܕ݁ܗܰܝܡܳܢܽܘܬ݂ܳܐ ܟ݁ܰܕ݂ ܪܣܺܝܣܺܝܢ ܠܶܒ݁ܰܘܳܬ݂ܰܢ ܘܰܕ݂ܟ݂ܶܝܢ ܡܶܢ ܬ݁ܺܐܪܬ݁ܳܐ ܒ݁ܺܝܫܬ݁ܳܐ ܘܡܰܣܚܰܝ ܦ݁ܰܓ݂ܪܰܢ ܒ݁ܡܰܝܳܐ ܕ݁ܟ݂ܰܝܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:22
23 ܘܰܢܚܰܡܣܶܢ ܒ݁ܬ݂ܰܘܕ݁ܺܝܬ݂ܳܐ ܕ݁ܣܰܒ݂ܪܰܢ ܘܠܳܐ ܢܶܨܛܠܶܐ ܡܗܰܝܡܰܢ ܗ݈ܽܘ ܓ݁ܶܝܪ ܡܰܢ ܕ݁ܰܡܠܰܟ݂ ܠܰܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:23
24 ܘܰܢܚܽܘܪ ܚܰܕ݂ ܒ݁ܚܰܕ݂ ܒ݁ܓ݂ܽܘܪܳܓ݂ܳܐ ܕ݁ܚܽܘܒ݁ܳܐ ܘܕ݂ܰܥܒ݂ܳܕ݂ܶܐ ܛܳܒ݂ܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:24
25 ܘܠܳܐ ܢܶܗܘܶܐ ܫܳܒ݂ܩܺܝܢ ܟ݁ܢܽܘܫܝܰܢ ܐܰܝܟ݂ ܕ݁ܺܐܝܬ݂ ܥܝܳܕ݂ܳܐ ܠܐ݈ܢܳܫ ܐ݈ܢܳܫ ܐܶܠܳܐ ܒ݁ܥܰܘ ܚܰܕ݂ ܡܶܢ ܚܰܕ݂ ܝܰܬ݁ܺܝܪܳܐܝܺܬ݂ ܟ݁ܡܳܐ ܕ݁ܚܳܙܶܝܬ݁ܽܘܢ ܕ݁ܰܩܪܶܒ݂ ܝܰܘܡܳܐ ܗܰܘ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:25
26 ܐܶܢ ܓ݁ܶܝܪ ܒ݁ܨܶܒ݂ܝܳܢܶܗ ܢܶܚܛܶܐ ܐ݈ܢܳܫ ܡܶܢ ܒ݁ܳܬ݂ܰܪ ܕ݁ܩܰܒ݁ܶܠ ܝܺܕ݂ܰܥܬ݂ܳܐ ܕ݁ܰܫܪܳܪܳܐ ܠܰܝܬ݁ ܡܶܟ݁ܺܝܠ ܕ݁ܶܒ݂ܚܬ݂ܳܐ ܕ݁ܬ݂ܶܬ݂ܩܰܪܰܒ݂ ܚܠܳܦ݂ ܚܛܳܗܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:26
27 ܐܶܠܳܐ ܥܬ݂ܺܝܕ݂ ܗ݈ܽܘ ܕ݁ܺܝܢܳܐ ܕ݁ܚܺܝܠܳܐ ܘܰܛܢܳܢܳܐ ܕ݁ܢܽܘܪܳܐ ܕ݁ܳܐܟ݂ܶܠ ܠܰܒ݂ܥܶܠܕ݁ܒ݂ܳܒ݂ܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:27
28 ܐܶܢ ܓ݁ܶܝܪ ܐܰܝܢܳܐ ܕ݁ܰܥܒ݂ܰܪ ܥܰܠ ܢܳܡܽܘܣܳܐ ܕ݁ܡܽܘܫܶܐ ܥܰܠ ܦ݁ܽܘܡ ܬ݁ܪܶܝܢ ܘܰܬ݂ܠܳܬ݂ܳܐ ܣܳܗܕ݁ܺܝܢ ܕ݁ܠܳܐ ܪܰܚܡܺܝܢ ܡܳܐܶܬ݂ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:28
29 ܟ݁ܡܳܐ ܣܳܒ݂ܪܺܝܢ ܐܢ݈ܬ݁ܽܘܢ ܝܰܬ݁ܺܝܪܳܐܝܺܬ݂ ܡܣܳܡ ܒ݁ܪܺܫܳܐ ܢܩܰܒ݁ܶܠ ܐܰܝܢܳܐ ܕ݁ܕ݂ܳܫܶܗ ܠܰܒ݂ܪܶܗ ܕ݁ܰܐܠܳܗܳܐ ܘܰܚܫܰܒ݂ ܕ݁ܡܳܐ ܕ݁ܕ݂ܺܝܰܬ݂ܺܩܺܐ ܕ݁ܺܝܠܶܗ ܐܰܝܟ݂ ܕ݁ܟ݂ܽܠܢܳܫ ܕ݁ܒ݂ܳܗ ܐܶܬ݂ܩܰܕ݁ܰܫ ܘܨܰܥܰܪ ܠܪܽܘܚܳܐ ܕ݁ܛܰܝܒ݁ܽܘܬ݂ܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:29
30 ܝܳܕ݂ܥܺܝܢܰܢ ܠܗܰܘ ܕ݁ܶܐܡܰܪ ܕ݁ܕ݂ܺܝܠܝ ܗ݈ܺܝ ܬ݁ܒ݂ܰܥܬ݂ܳܐ ܘܶܐܢܳܐ ܐܶܦ݂ܪܽܘܥ ܘܬ݂ܽܘܒ݂ ܕ݁ܰܢܕ݂ܽܘܢ ܡܳܪܝܳܐ ܠܥܰܡܶܗ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:30
31 ܕ݁ܶܚܠܬ݂ܳܐ ܗ݈ܝ ܪܰܒ݁ܬ݂ܳܐ ܠܡܶܦ݁ܰܠ ܒ݁ܺܐܝܕ݂ܰܘܗ݈ܝ ܕ݁ܰܐܠܳܗܳܐ ܚܰܝܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:31
32 ܐܶܬ݁ܕ݁ܰܟ݂݈ܪܘ ܗܳܟ݂ܺܝܠ ܠܝܰܘܡܳܬ݂ܳܐ ܩܰܕ݂ܡܳܝܶܐ ܗܳܢܽܘܢ ܕ݁ܰܒ݂ܗܽܘܢ ܩܰܒ݁ܶܠܬ݁ܽܘܢ ܡܰܥܡܽܘܕ݂ܺܝܬ݂ܳܐ ܘܰܐܓ݂ܽܘܢܳܐ ܪܰܒ݁ܳܐ ܣܰܝܒ݁ܰܪܬ݁ܽܘܢ ܕ݁ܚܰܫܶܐ ܒ݁ܚܶܣܕ݁ܳܐ ܘܒ݂ܽܐܘܠܨܳܢܶܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:32
33 ܘܕ݂ܰܗܘܰܝܬ݁ܽܘܢ ܚܶܙܘܳܢܶܐ ܘܳܐܦ݂ ܐܶܫܬ݁ܰܘܬ݁ܰܦ݂ܬ݁ܽܘܢ ܠܐ݈ܢܳܫܳܐ ܕ݁ܗܳܠܶܝܢ ܣܰܝܒ݁ܰܪܘ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:33
34 ܘܟ݂ܶܐܒ݂ ܠܟ݂ܽܘܢ ܥܰܠ ܐܰܝܠܶܝܢ ܕ݁ܰܐܣܺܝܪܺܝܢ ܘܰܚܛܽܘܦ݂ܝܳܐ ܕ݁ܢܶܟ݂ܣܰܝܟ݁ܽܘܢ ܒ݁ܚܰܕ݂ܽܘܬ݂ܳܐ ܣܰܝܒ݁ܰܪܬ݁ܽܘܢ ܡܶܛܽܠ ܕ݁ܝܳܕ݂ܥܺܝܢ ܐܢ݈ܬ݁ܽܘܢ ܕ݁ܺܐܝܬ݂ ܠܟ݂ܽܘܢ ܩܶܢܝܳܢܳܐ ܒ݁ܰܫܡܰܝܳܐ ܕ݁ܰܡܝܰܬ݁ܰܪ ܗ݈ܽܘ ܘܠܳܐ ܥܳܒ݂ܰܪ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:34
35 ܠܳܐ ܗܳܟ݂ܺܝܠ ܬ݁ܰܘܒ݁ܕ݂ܽܘܢ ܓ݁ܰܠܝܽܘܬ݂ ܐܰܦ݁ܶܐ ܕ݁ܺܐܝܬ݂ ܠܟ݂ܽܘܢ ܕ݁ܰܥܬ݂ܺܝܕ݂ ܠܳܗ ܐܰܓ݂ܪܳܐ ܣܰܓ݁ܺܝܳܐܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:35
36 ܡܣܰܝܒ݁ܪܳܢܽܘܬ݂ܳܐ ܗ݈ܘ ܓ݁ܶܝܪ ܡܶܬ݂ܒ݁ܰܥܝܳܐ ܠܟ݂ܽܘܢ ܕ݁ܬ݂ܶܥܒ݁ܕ݂ܽܘܢ ܨܶܒ݂ܝܳܢܳܐ ܕ݁ܰܐܠܳܗܳܐ ܘܬ݂ܶܣܒ݂ܽܘܢ ܡܽܘܠܟ݁ܳܢܳܐ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:36
37 ܡܶܛܽܠ ܕ݁ܩܰܠܺܝܠ ܗܽܘ ܙܰܒ݂ܢܳܐ ܘܛܳܒ݂ ܙܥܽܘܪ ܕ݁ܢܺܐܬ݂ܶܐ ܗܰܘ ܕ݁ܳܐܬ݂ܶܐ ܘܠܳܐ ܢܰܘܚܰܪ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:37
38 ܟ݁ܺܐܢܳܐ ܕ݁ܶܝܢ ܡܶܢ ܗܰܝܡܳܢܽܘܬ݂ܳܐ ܕ݁ܺܝܠܝ ܢܺܚܶܐ ܘܶܐܢ ܡܶܬ݂ܩܰܛܥܳܐ ܠܶܗ ܠܳܐ ܨܳܒ݂ܝܳܐ ܒ݁ܶܗ ܢܰܦ݂ܫܝ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:38
39 ܚܢܰܢ ܕ݁ܶܝܢ ܠܳܐ ܗܘܰܝܢ ܕ݁ܩܽܘܛܳܥܳܐ ܕ݁ܡܰܘܒ݁ܠܳܐ ܠܰܐܒ݂ܕ݂ܳܢܳܐ ܐܶܠܳܐ ܕ݁ܗܰܝܡܳܢܽܘܬ݂ܳܐ ܕ݁ܡܰܩܢܝܳܐ ܠܰܢ ܢܰܦ݂ܫܰܢ ܀ BFBS ܐܓܪܬܐ ܕܠܘܬ ܥܒܪ̈ܝܐ 10:39

Bijgewerkt: dinsdag 29 mei 2012
© geldig vanaf 21 oktober 2013
Copyright indicatie 'Creative Commons' CC-BY-NC-ND. U mag de Peshitta.nl tekst ongewijzigd, niet commerciëel, in willekeurige mediavorm distribueren met vermelding van de oorspronkelijke naam Peshitta.nl
U mag de Peshitta.nl tekst alleen distribueren als u deze licentie ongewijzgd laat.

Syriac Fonts provided by George Kiraz. Peshitta source, UBS 1905 text.

Download e-Sword module (door Ad Oprel) voor Peshitta_nl
Volg peshitta.nl via Twitter.